النايحات

[بيت الطين]

من قصائد المرحة الثانية (الجديدة)



يا حمام ناح في عال الغصون=من لعا بالصوت هيج لي شجون
حسبك الله ياحمام الورق ليش=تنبش الذكرى على قلب حزون
الحزن والحب وايام الشباب=يوم كل في هوى غاليه طاب
يا زمان كل ما منه حلا=مثل حلم الليل او مثل السراب
السراب اللي بصحرا الحب فاض=بين رجوى عطف خلي وامتعاض
ما اسرع الايام والفرقا تجي=والليالي لونت راسي بياض
البياض اللي بوجه الزين بان=من جبين شاق عيني من زمان
او خدود ناعمات موردات=او شفايف بينها اللولو ثمان
الثمان تبان حين الابتسام=يا سلام الله سلام وياسلام
ما لقينا بالهوى غير الشقا=يالله اني طالبك حسن الختام
الختام بليلة عندك حبيبك=كل ماتنده على خلك يجيبك
غايبين عن عيون الحاسدين=وانقضى ليله يقول الله يجيبك
جابك الله عندنا في كل ليلة=ودنا نسهر على وسط الخميلة
لين ضو الفجر للعشاق فرق=والمثل يقول ما باليد حيلة
حيلة اللي كل منا شال همة=ما اكثر الهموم بالقلب ادلهمة
وانحدر فوق الخدود الدمع سايل=والجروح النازفة بالقلب دمه
ادمت الفرقا صناديد صحاح=قبلنا بالحب واسهوم الرماح
من يداوي بالهوى قلب جريح=ذكرن بالحب خفاق الجناح
الجناح اليا انكسر عزي لحالي=من صواديف المحبة والليالي
من يعرف الحب ودروب المحبة=ما يعذل اللي بكا بالود غالي
غالي حبة بوسط القلب جاشي=يجتلد وسط الضماير والحواشي
كلما قلت الهوى للكيف رايق=ابتدا باوضاع ما نقدر لهاشي
ما قدرنا للهوى والا قدرنا=كيف نهرب في هوانا من قدرنا
الهوى والحب واطراف المودة=والعيون الناعسة ترقب قمرنا
القمر ليلة تمامة في كماله=مثل خلي شاق عيني في جماله
ليلة قمرا و محبوب نحبة=مع لذيذ فيه شك من حلاله
الحلال احلى من الحالي عسلنا=والمرار من الهوا عنهم شغلنا
والغلا والجرح بالقلب المعنا=لو تعبنا من عناهم ما عدلنا
العدل حكمة اله العالمينا=الغفور ونطلبه يستر علينا
ويحمانا من شرور الحاقدين=ارحمونا بالهوى يا عاذلينا
العذول الله يجنبنا طريقة=كل همه يشعل بقلبي حريقة
وش بقا بالقلب من كود المحبة=ليت منهو يرشف من الزين ريقه
ريقة اللي يشفي بقلبي جروحة=اليا تلاقت بالهوى روحي بروحة
ثم سجعنا بالهوى مثل الحمام=وارتجف عرش المحبة من مزوحه
المزوح اللي سطا بالقلب حبه=هو سبب جرحي وهو للقلب طبه
لانتحى عني سهرت الليل كله=واتجرع بالهوى الفين حبه
حبة تغرس وتنبت نبات=حلوة ماهي بتوجد بالبنات
كلما قربت لمه زال همي=وان بعد عني همومي مقبلات
مقبلات ليت هن مايجنبني=السعادة والوناسة والتهني
والغلا والود وايام المحبة=والليالي اللي مضن لي ذكرني
ذكرنَّي بالمحبة والمودة=والحبيب اللي شغل قلبي بودة
ما حلا هاك السنين الماضيات=بين سمر وبرق وارض مجرهدة
اجرهد الحب بالقلب وغشاه=واشعل النيران بالقلب وحشاة
واحسب ان الحب تمحاه السنين=او يذوب اليا حكو فينا الوشاه
الوشاة اللي سعو بين الحبايب=ينشدون افراقهم والحب غايب
ما درو ان المحبة راس مال=مثل ما تحيا الوطاة من السحايب
السحاب اللي تهامل من مزون=علل النفس العليلة من شجون
انتهي بالشعر من حيث ابتديت=يا حمام ناح في عال الغصون


وســــــلامتكم