الشينات

[بيت الطين]

من قصائد المرحة الثانية (الجديدة)




يقول من غنا بعذب المعاني=يفور من صدرة كثير المعاني
يذكر من فعول البشر كل شينه=تلوج وسط النفس لوج السواني
يا شين لا عديت في راس مرقاب=رجم براس مشمرخ يسكنه داب
وقت الغروب ولا جلس حولك اصحاب=من ضيقة بين الضلوع المحاني
ويا شين لا جريت بالشوق ونه=من جادل سود الليالي حدنه
لا واعذاب اللي من الزين كنه=يصلا على نار لهيبة شواني
ويا شين طعم الحب لاصار ماصار=الذ مابه علقم زاد الامرار
وانا شربت من الهوى شرب الابكار=الله بدرب اهل المحبة رماني
ويا شين جور الحب ويا شين راعيه=اللي يعرفه زين ، ويتبع مماشيه
هو ليه ما يترك سبيله ويجفيه=والا المحبة طعمها شكل ثاني
ويا شين لا حسيت جرحك ولا طاب=جرح يلج بجشة الصدر دولاب
يفوح فوح النار من بين الاجناب=وانته تعرف اللي يداويه جاني
ويا شين منهو صار فيه انتكاسة=شايل همومه عقب ذيك الوناسة
يسقيه من مر العزاير بكاسة=خرعوب لعبوب طروب اللساني
ويا شين من قفا حبيبه وخلاه=ما هو براجعلة ولا فيه ينصاه
يطحن غبون وتذرف العين عبراه=على الذي لامن طرالى كواني
ويا شين لا صار الهوى راس مالك=عز الله انك خايب في حلالك
ما بالهوى غير الشقا و التهالك=الله يثيب اهل الهوى بالحساني
ويا شين لا هبت عليك الذواري=في مهمهات ما بها لك مذاري
وتعطل المركوب وسط البراري=وامسى عليك الليل والنجم باني
ويا شين من يبحر بليا مجاديف=وسط البحر ما حوله الا صواديف
دنياك يالمسكين دايم تحاذيف=ماقدر الله صاير لك عياني
ويا شين لو تبني بالافكار لك دور=هواجس بالراس تلتف وتدور
بينك وبين النفس صفحات وسطور=تبني ولكنك تهدم المباني
ويا شين لا دارت براسك وساويس=قامت تصفق بك هموم وهواجيس
مر يروح ومر يرجع لك بليس=والنفس بين وبين بالشقلباني
ويا شين من يسكت على الظلم والجور=اللى مع اهل الشر منهي ومامور
ما خاف ربه منزل الطور والنور=رب الخلايق كل يوم بشاني
ويا شين لامن فارقك نور عينك=اللي على فرقاه ربي يعينك
اليا انقطع حبل الوصل من يمينك=ما عاد ترجي جيتة لو ثواني
وياشين من هرجة من السم مشحون=يضحك وهو قلبة من الحقد مدفون
ان شاف خيرٍ فر والشر مكنون=بين الضلوع اللي لهن اخفقاني
ويا شين من وده بحاجة ورماها=يبلا بها منهو غني بلاها
يعبر عن اللي داخل النفس جاها=مريض نفس بعلة السيقطاني
ويا شين من دور على الغير هفوات=واليا حصل بينه وبينه مشاكات
مثل المدافع شبها نار بسكات =يرميه بالهفوة وهو هيفواني
وياشين من لا تستشيرة وبيديك=بالشور وانت الله عن الشور مغنيك
ان طعت شورة خيب الله رجاويك=يالعبد عندك عقل وعندك لساني
ويا شين من يغضب حدا والدينه=يومه صغير عن البلا حافظينه
واليوم ليه وليه تبت يدينه=الله شركهم بالشكر يالخداني
ويا شين من قوله يخالف فعوله=هو يحسب ان الناس ما يربعو له
هذاك مثل اللي تظلل نعوله=يبي يغطي سيتة هيلقاني
ويا شين من يصبر على ضيم الايام=وام العيال اكبر منه عشرة اعوام
يمدحبها ماكن مثلة بالآنام=وهو يحسب انه ملك حبهاني
ويا شين منهو سدد الدين بالدين=ماهو بمرتاحٍ حياته غدت بين
متلخبط التفكير والعقل والعين=مثل الذي يحمل شبكة الهداني
ويا شين لو يطمع بك الطامعينا=وانته تقول الله عليهم يعينا
تدعي عليهم بالصلاة اجمعينا=يالله يالمعبود ترحم كياني
ويا شين من يجزى هل المكر بالطيب=اللي غدو بين البشر بالخراعيب
ماجوبهم ضحك على اهل المواجيب=حسبي عليهم ضيعو لي اماني
ويا شين من جرعك لوعات وغبون=تسوي به المعروف وينكرك وش لون
حاجتك عنده وهو يلعب بمليون=يجزيك بالنكران قبل الحساني
ويا شين من يهدي هدية لميسور=والله عطاة الخير والرزق والدور
وينسى هل الحاجة ولا هو بمعذور=ما همه الا ويش سوا فلاني
ويا شين مغرور كذوب مفوه=وانته تعرف انه قليل المروه
واليا جلس في مجلس به فتوه=قام يتميلح عندهم هيلماني
ويا شين من يمدح رجال عريقة=من يمدحك سبك وهو في طريقة
وشلون تمدح من تعلا بريقه=مثل سحاب الغيث برقة ضفاني
ويا شين من يركض ورا جمع الاموال=بخيل محروم مخيس ومحتال
كثر الطمع نساه عن يوم الاهوال=لابد ما يوم عن المال فاني
ويا شين بالنسوان من تلدغ بهون=تجدع كلام داخلة سم مدفون
ما قصدة الا جرح كبد بطاعون=الله حسيبة يوم فوز اليماني
ويا شين لا صارت حليلتك غبرا=تامر وتنهى بين سب وزقرا
ما تحترم زوج عليها تسترا=خابت وخاب الزوج قاصي وداني
ويا شين لو عاشرت سمج جلاها=وانته تراعي خاطرة من غلاها
وهي تحسبك انك ضعيف بلاها=تغث كبدك غثت التيتهاني
ويا شين بالنسوان من تاخذ دروس=ولا فاده التعليم تحوس وتدوس
ما همها الا كم معها من فلوس=بقاموسها التعليم ماله مكاني
ويا شين بالنسوان من تدعي الدين=وهي بهمتها تهضم المسيكين
تحرم على بيته طعام المصلين=وتحلل اللي جازله من معاني
ويا شين من لا جيت لمه تلقاك=باحلى التحايا خاصة في ملاقاك
ولا اقفيت من عنده سهومه تقفاك=يطلق من عيونه كما الطرطعاني
ويا شين من يزعل على الناس الادنين=مهما حصل ما بين الاخوان من شين
من طاوع الشيطان يصلى الجحيمين=الله يقدينا طريق الجناني
ويا شين من كثر عليك الهذاري=شمطا تجوب الحي مثل الخداري
من سحنة الدجال فيها مواري=تزيد بالكذبة عليها ثماني
وياشين من يركض ورا جلد منفوخ=والا يراعي عبد والعبد مصلوخ
يناس هو هذا على الراس مكموخ=او صاب عقلة مس والا جناني
ويا شين من لا حاسب النفس بالحال=عن كل فعل شين يا طيب الفال
واعرف ترا قافيك قصاف الآجال=عدل دروبك خير كل الاماني
ويا شين من يقضي حياته مكده=على عيال ما وراهم مسده
كبرو وكثر الشغل بالحيل هده=ما همهم مرتاح والا تعباني
ويا شين منهو يستعير الحقيقة=والنار في كبدة سوات الحريقة
انا اذكر السية واجنب طريقة=وختامها بالحمد للي هداني


وســــــلامتكم