بالله يابقعا وش اللي تقولين=لاقلت لك ماقالته بك عفيفه
حلوة نبا طيب وسخا للمساكين=مدت عطاها نصرة ٍ للضعيفه
على فراش الموت بحضور غالين=قالت بوصيكم وصاة ٍ خفيفه
الموت لاجاني فماهو مخلين=لكن بصدري منية ٍ ما اعيفه
قبري ابيه ابديرتي يامحبين=ابي ثرى بقعا لحاف وقطيفه
تبي توفر عنوة اللي بعيدين=تشيل هم الناس روحه رهيفه
واليوم يابقعا قبل فجر الاثنين=قالو توفت عقب حال ٍ كسيفه
رغم المرض وسموم جرح ٍ من سنين=رغم الألم واوجاع قلب ٍ عنيفه
تقول صبري للولي بالموازين=تكفير ذنب وياعساني نظيفه
مير اسمعي ياديرتي قولي آمين=عساه في روض الجنان المريفه
يالله ياقابل دعاوي هل الدين=تقبل دعاوينا وترحم لطيفه
راضين بالمكتوب راضين راضين=غير الدعا مافيه شي ٍ نضيفه