من قصائد المرحة الثانية (الجديدة)
انهزامي

انهزامي ... قلت انا طبعي كذا=ليّن الجانب مع اللي يجهلون
كل جاهل من طبيعته الوذا=وش علي ان كان مع جهله جنون
استعير الصبر في طبعي لذا=مايهمن لو ورا ظهري يحكون
من يطيع الناس يعميه القذا=والقدا يخطيه وتمسيه الظنون
حبذا لو تسالوني حبذا=عن شعوري وانهزامي وش يكون
احلم اليا بالغلط شخص شذا=وابتسم له واتلطف له بهون
طبعي اللي من سعة صدري خذا=راحة الخفاق واغماض الجفون
جدي الاحنف من الحلم احتذا=اقتدي به في حركتي والسكون
هكـذا والا بلاها هكـذا=هل يكون الود والا ما يكون

اليا من الزمن والبيت واهل الحي والديرة=تعاون بعضهم مع بعض على شان يتحدنه
وصارت حالتة حالة وزاد الشك والحيرة=وكل زادت اهروجة وصار عيوب يتلنة
وكل فتح اعيونه وكل جاب له سيرة=يصفون الكلام الكاذب اللي يوجب الونة
دعيت الله هو الملجا اله ماحد غيرة=هو اللي يعلم الخافي الهي صاحب المنة
تركت الناس في شرة وتركت الناس في خيرة=اداريهم واجنبهم واعيش بدنيتي جنة
انا حر بتفكيري انا طير بتفكيرة=سما عن هرجة العذال وهموم يلوعنة
فلا للحر حرية اذا لبِّس اساويرة=هلا ياطير ياللي بالشوامخ ما يردنة
ولا للفكر حد في خيالاتة وتفكيرة=هلا يالفكر ما يسمع كلام اللي لهم خنة
ولا للهرج من معنى اذا كثرت ثراثيرة=هلا بالمنطق الموزون وكل سائل عنه
ولا للخل من عشق اذا زادت تباريرة=هلا بالعاشق الصادق جروح الشوق يشضنة

وش تبي يا جروحي من عذابي فوايد=يا هواي وشقاي ويا مناي وعناي
كيف عذبت قلبي بالجروح الجدايد=كلما جيت ابنسى الجرح عود بلاي
ان تركت المحبة وين احط القصايد=من لي يسمع لحوني يوم اطوح غناي
انت شيطان شعري يوم اجيب الفرايد=وانت سبة عذابي وانت قمة بلاي
وانت مجروح تجرح وانت مصيود صايد=وانت قدام عيني ليه تمشي وراي
احسب اني سحرتك يا كثير العنايد=ساحر وانقلب سحري علي برضاي
قمت ادور بقوقل قالو الناس كايد=وين تلقى وليفك بين رايح وجاي
كيف افرمت هوىً لك بين حدب الجرايد=وانت فيروس حبك في عروقي رجاي
اكتبك يا حياتي كل حرف قصايد=وانسخك من عيوني والصقك في حشاي
وارسمك لوحة لي يا غزال الطرايد=واطبعك صورة لي وانت جالس معاي
شاشة الشوق تشعل بي كثير الوقايد=ولوحة به مفاتيح الغلا من غلاي
وانقلك من ملفك بالليالي الشدايد=ثم اغير مكانك واحضنك في دفاي

المشكل اني عرفت الحب وطروقه=من يومني توني في بادي ايامي
واليوم راسي غزاه الشيب وطفوقه=سود الليالي محت لي عذب الاحلامي
شربت مر الهوى بالقلب وعروقه=عزي لقلب على درب الهوى ضامي
ما يرتوي والعذاب يزيد بحروقه=حسبي على من يطاول جرحي الدامي
الشكوى لله عليه النفس مخنوقه=يالله تجيب الفرج وتزيل الاوهامي
بيوم يجينا الخبر ... شيلوه برفوقه=ودوه للي بها ترتاح الاجسامي
يالله يا سامع دعوات مخلوقه=اتبدل الحال ... حال كلها اسقامي
وتزيل هم على قلبي رقا فوقه=وتبدل الهم .. وتسعد باقي ايامي
الله على من يرد لقبي احقوقه=ينسيه ما فات من تعذيب وآلامي
بدر كما البدر وشروقه هي اشروقه=غرو يكت الغلا عندي وقدامي
واليا استجد الغلا ذوقي على ذوقه=ريمية تستحل ارواح الانامي
واليا عطشت الهوى يرويني بشوقه=ويسقيني الحب في كاسات الالهامي
واليا تضايقت يشرح قلب معشوقه=يبري جروح قديمه تنخر عظامي
هاذي اماني خفوق تشعل ابروقه=اما يجيه الحيا والا بقا ضامي