كلن يرا في نفسه انه على صح=كلن يقول ان السنع من سجاياه
وانا اقول ان السنع صايبه شح=اهل العقول النيره قل شرواه
ماذل غيري لا ولاني ملمح=لكن هي القيفان هذي خفاياه
لاجيت اخبيها تجلجل وتفضح=لحدن يلوم الشاعر ان ساق معناه
من بعدها قافي يفصل ويشرح=واللي يعارضني على الدوم حياه
يارافع خشم الكبر معك ابمزح=اسأل مراية بيتكم يوم تلقاه
ايه اسأله ماقول قدامها كح=تلقى تفاصيل الطبايع ومبداه
اقره وخذ في نصحها يوم تنصح=لاتفهمه ساعه وتقفي وتنساه
ابسألك عن مكسبك فضلا افصح=اقصد مكاسيبك من الطيب والجاه
اسف على التعبير ماقصدي اجرح=للقاف تالي والتوالي ابمحاه