تساقط في ظلام البارحه ماعافت الاغصان=على ارض ٍ غضبها ..ماهدى لو قلت له هدي
نويت احرق جميع اللي وقع واشعل به النيران=ولكن الرياح العاصفه ثارت.. معي ضدي
تفاصيل الفصول الاربعه ماغيرت انسان=براده مع سمومه دايما ً ياخذ ..ولايدي
عدا ذاك الجفاف اللي يبس من سبته شريان=وصار الخافق المغرم على التوديع ..منحدي
مداد الحرف لو ياصف وجع ماوصف الهجران=قناعة واطي الجمره ..تعوق الحرف ويرتدي
الا ياكل احاسيس الغلا طيعي.. كفى عصيان=كفايه مامضى ..خلك معي لاقلت لك شدي
نبي نرحل ولانترك اثر في صفحة النسيان=سوى ابيات شعر ٍ كانت الشاهد على ودي
نعم ..كان الغلا دوله نقيه تلعن الشيطان=نعم .. كان الوفا حاكم وللعذال متصدي
نعم كنا كما حنا بقلب ٍ واحد ٍ ماخان=نعم كانت بساطه في احاسيسي على قدي
نعم كان ونعم كنا ..ولكن وش تسوي كان=وقع من خافقي حبه مثل دمع ٍ على خدي