من ملفات الحياه اللي نشوفه بالعيون=من قلوب ٍ لابغت تنهض كسوره يثبرنه
من معاناة البشر/من هم ينهش في سكون=من كفوف الطيب لامن الهبايب بعثرنه
من سكوت الحاجه بنفس ٍ حسيره ماتهون=من زهور ٍ ماهقت ان السحايب يقبرنه
من/الى مالا يطيقه عاقل ٍ صابه جنون=من حكايات البشر/حتى قصيد ٍ ثورنه
كيف حال الناس كله..مالهم لايضحكون=للقلوب احزان غبرا..كل لحظه يسمرنه
ليه من يزرع وفا..يلقى جحود ٍ مع طعون=العطا :ماينبت الا في قلوب ٍ قدرنه
كل من اهدى خفوقه واشعل اشواقه دخون=ينتظر انفاس خله يشهقن مايزفرنه
من كفر في سوء ظنه..قال خلي مايخون=والبلا لافاز ظنه..والمشاعر كفرنه
من غفر زلات خله مايقول انه يمون !=وش يسوي في احاسيس الغلا لاحاصرنه
لو يعاتب/لو يحاسب/لو زعل:قلبه حنون=هذا هو حال الهوى بقلوبنا..لو ينكرنه
هذا حالك ياقلوب ٍ ماحبس دمعه جفون=من حزن/او من فرح/والا امور ٍ كدرنه
البشر كله كذا ..لكن عساهم يقنعون=(ماخبرت ان السعاده جت قلوب ٍ يحترنه)
مانلوم الصحاري لو تحرا للمزون=العواصف والسوافي ..كل غصن ٍ كسرنه
البدو ..لا امحلت ارضه وغارن العيون=ماتلام ان عافت ارضه والركايب غادرنه
الرحيل ان كان قاسي ..فالمحل ماذا يكون؟=يكفي الاشجار ماخلن ورق ماحورنه
والندى لو كان حاظر ماتفطّرن الغصون=كل عرق ٍ من عروقه ساعة الضيق عصرنه
قلت يكفي يابشر ..وان قلتها لاتسألون=ديمة ٍ هزت خفوقي .. والقوافي صورنه