صاح الشعر ..واستنطق احساس مجروح=حتى الورق ..من لهفته قال ابمتد
واليد ..يجري به قلم ترجم البوح=لو تتركه يدي ..جرى دون هاليد
لكن عرفت ان الشعر شاحني شوح=وان القصيده ..صوت ماضي الى الغد
المشكله ..ماهي بقيفان في لوح=المشكله ..بكرا مطنش ولا رد
والأعظم ان الصوت ..مايقدر ايروح=يصدم حواجز لحظتي ..ثم يرتد
لكن هي الاحلام ..تبني لي اصروح=تضحك علي ..واحس عمري تجدد
اهدتني المركب ..على بحر مفتوح=ابحر على كيفي ..عن الواقع ابعد
مجدافي الاحساس ..ورباني الروح=والبوح ..خلا هايج الموج يركد
اطوي مسافات الفكر ..دون مصلوح=بحر الاماني طال ..مابان له حد
مشوار ضايع ..في تناهيت مشفوح=زهابه الذكرى ..وباكر تصدد
ودي مراسي رحلة احلامي اتلوح=يمكن خفوقي بالمقابيل ..يسعد
يمكن /وليت/ وآآه/ باحساس مفضوح=مع صيحت ابيات الشعر ..غرّقه مد
مد الحقيقه ..مايبي درس مشروح=يقوله الواقع ..والاحلام ترقد
ترقد بروح انسان ..ماقال وشنوح=واجه معاناة الزمن .. ند للند
ياشعري اللي صاح ..والصوت مبحوح=خل الورق يمتد اكثر ..ابسرد
اسرد حكاية خافق ٍ ..مات مذبوح=والمتهم رمش ٍ ..رمى الروح بالصد