لو ليت تنفع قلت ياليت ياليت=لكنها ياليت حلم بصحاوه
بعض التمني يفضحك لو تمنيت=والبعض الآخر مابطعمه حلاوه
انا طلبت الخل يرجع والَحّيت=من زود شوقي زاد قلبه قساوه
خذاني التفكير فيه وتماديت=وعقلي غدا مشغول عقب الفضاوه
من عقبهم زاد المرض ماتشاويت=خايف مع الايام تبدأ عداوه
خايف عليه ان رحت وابعدت واقفيت=يرجع يبي وصلي ويلقى جفاوه
ياما على شانه سهرت وتعنّيت=واكتب قصيدي من عطر عود جاوه
انا بكيت بسبته ما تباكيت=واصبح على العينين مثل الغشاوه
واليوم جافيت السهر داخل البيت=واسهر مع الشلات والقى حفاوه
طبعي كذا من عافني عنه صديت=واذا لفاني ضيف فيني بداوه