مشتاق اسولف واكتب اشعار بالكوم=ولا حصل لي من يرد السواليف
قلبٍ تهيض وامتلا شوق واعلوم=كثرت هذاريه وصابه تخاريف
استوطنه زخم وجحافل من اهموم=يسوقها للقلب فرقا المواليف
غديت مثل اللي يبي يلحق القوم=لا هو بلاحقهم ولا له مناكيف
وش لي من الحيلات لا صرت منجوم=عشت بزمان العولمه والملاقيف
راح الربيع وما بقا غير مرسوم=اخيل نو الماطرات المذاريف
والله يلو رممت الاعواد بالدوم=وحسلكت بغصون الزمن والطواريف
لا بان صبح الراس في تالي اليوم=والليل ساري والكوكب مهاريف
ترى سما الاحلام ما تبيّن نجوم=تسري على الوجهه بسوق الصواديف
والريح تصفق بك على كل مرجوم=وتصير لعبة في يدين العجاريف
يا حظ ياللي كل ما قلت له قوم=عوّد يغط بنومته تقل حريف
قم وانتهض خلك معي دايم الدوم=قوطر على ما نهتوي دون تكليف
رسمت لك جوري وكادي ويشموم=وردٍ تنثر بالحلا والتواصيف
وردٍ اليا منه طرا طيّر النوم=يصير كنه ساكنٍ من ورا جنيف
ابيك تتعب دامني فيك ملزوم=وتريحن يا حظ من قبل لا هيف

المشاركة الأصلية كتبت بواسطة بوح وجداني (المشاركة 39429) جميله هذه القصيده ياشاعرنا فيها عفويه وبساطه فيها كلمات من صميم العاميه التي اعطتها طعم رااائع وانا اقول توك شباب يابوعزوز والله يعطيك الصحه والعافيه صح لسانك مع مطخات اشتياق لروحك الطيبه

المشاركة الأصلية كتبت بواسطة ديم (المشاركة 39439) صح كلك يَ الشاعر وقصيدك له جو يجبر من يقراه يعيش كل تفاصيله دمت لنا نبض جميل ومشاعرصادقه ,, لقلبك:067:

المشاركة الأصلية كتبت بواسطة ابراهيم الحربي (المشاركة 39444) ماشاء الله عليك يابو عبدالعزيز صح لسانك وصح بدنك لاهنت على هالابيات الجميلة تجبرنا بابياتك على قرائتها كامله بدون ملل وبكل متعه تحياتي لك ولكل من يمر هنا

سلامتي صح لساني صح بدني

المشاركة الأصلية كتبت بواسطة انا هو انا (المشاركة 39484) ههههههههههه صدقت يابو عبدالعزيز بجد قصيده ذات رونق وجمال شاعر مخضرم يالغالي يسلم افمك