لي سؤال .. ومنتظر منك الإجابه=هل أنا محسوب ظمن العاشقين ؟
وكانني عاشق .. أجل ليه الكآبه=تركي اعروقي على جمر الأنين
يا حبيبي : ما تمل من الكتابه؟=لعنبو حيك .. عذرتك مرتين
ما قريتك بالحروف اللي تشابه=يالغلا .. قاريك بين الدمعتين
يا ( أمير الورد ) هالعاشق غدا به=من جنونك .. نزف .. تكتبه السنين
تحتريك الروح .. بإحساس ، ومهابه=وأنت متردد .. تسوق الخطوتين
ملـّـت اوقاتي دقايق .. هالرتابه=وأنت ما بين احتراقي بك .. وبين
صمتك ، وخوفك عليّ .. لكن إذا به=بإنتظاري لك أمل .. فالله يعين
كنت لي حلم ، ومدارات ، وقرابه=وصرت لي أقسى من الجرح الدفين
إيه أحبك .. والوفاء طاهر ترابه=لا تقول : الحب فينه ؟ وأنت فين
يا بعد عمر النقاء ، واللي مشا به=رد لي عقلي .. وظم الآهتين
ما أبيك تعيش في جو الغرابه=وما أبيك إنسان .. في شخصيتين
( بوح صمتي ) لا تطوّل عند بابه=وكان عندك شك ، أنا كلي يقين
دوك قلبي .. شقـّه .. وشتت عذابه=وشوف حبك بالحشا .. واصل لــــ وين