ياقمر مهما تغيب وتختفي=لك مكانك في غيابك والحضور
لاتكذبني ولاني حالفي=ذي حروفي ترسم احساس وشعور
احرف الاحساس ماهي احرفي=يكتبه قلبن بحبك مايبور
قالها قلبن بحبك مكتفي=وحدك اللي تملك اسباب العبور
شف نجومن بالسما كيف تهفي=صدها قلبن على حبه غيور
القدم تحفى وشوقي ماحفي=يجذبه وصلك ويلقا منك نور
اقتني وصفك وتصبح متحفي=كل تحفه تجلب افراح وسرور
وان لمحتك بالسما كيف احتفي=يستر الله من براكيين تثور
في حضورك عالمي اصبح نفي=بس انا وانتا وحبن بالصدور
في حضورك كل حزني ينطفي=طلتك فيها تجابير الكسور
اكره التبذير ولاني مسرفي=الا في حبي معك وانا معذور
ياقمر حبك بقلبي يعصفي=لاتوردني بهجرك للقبور
ينصف العاشق خليلن منصفي=هذا دستور الغلا مر الدهور
الاكيد انك بلا شكن وفي=بس انا من لهفتي ماني صبور
ياقمر كلمة احبك ماتفي=يعجز التعبير عن وصف الشعور
ماظهرلك شي والكايد خفي=مابي اتجاوز اشارات المرور
ادري اني لو تجاوزت تعفي=بس اخاف العاقبه فيها غرور