بقايا محبرة شعري من دموعي ابرويها=مدام ان الدموع تحاكي احساسي بدمعاته
ابي ريشة حروفي تنزف العبره وتحكيها=ويسبح طاغي المعنى ولايغرق بعبراتـه
عبارات ورموز بمملكة صمتي اغنيها=شعوري ينثر الوانه وشعري ينظم ابياته
طويل الليل يلقى بي من الحيره معانيها=ويبحر في معاناتي ولايوصـل نهاياتـه
نجوم الليل في وكره تناجيني واناجيهـا=بعيني ارسل النجوى ولو طالت مسافاته
صحيح انه جماد ومنطقي ماهو محاكيها=ولكن بوح وجداني يترجم لي عباراتـه
الا يالشامخات بعالم اللوعـه وامانيهـا=سألتك واسألك دايم عن اللغز ومتاهاتـه
اجاباتي اسيره في سجون الامس اداريها=عناي ان الخفا يجرح اجاباتي سؤالاتـه
ويبقى داخلي شمعه تذوبهـا بلاويهـا=وتذرف شمعها دمعه وتفنيهـا اذاباتـه
بداياتي نهايه والخفايـا فـي محانيهـا=ويبقى للشعر همسه وللشاعر معاناتـه