التناقض

فيني من جور التناقض بالهبال=ضحكتي وابكاي وافراح ونوى
والسهر والنوم والشمس وظلال=والرجا والياس والصمت وعِوا
شوقي اللي بالجناحبن استشال=مع هبوب النود رفرف والتوى
اتحرى جيته والوقت طال=وادري ان الوقت لا فات انطوى
ارتجيه من الغلا وادري محال=جيته .. ما عاد لفراقه دوا
كل شي من عقب فرقاه زال=ما عدا ذكراه تشعل بي ضوى
آه ياجرح عليه الدم سال=بين عسبان المحاني وانكوى
كنت انا واياه شمعات الليال=نحترق .. واليوم نشكيه الجوى
يا غناتي عن جميع اهل الكمال=شب ناره بالخفوق وانزوى
سارح حبه بقلبي في دلال=من حشيش القلب يرعى وارعوى
صار لي مده وانا اندهله تعال=ليت من له حيلة لمه ضوى
ليت من له قدرة ساعة وصال=ليت منهو من هوى خله روى
لا نظرت لصورته آية جمال=وصوتها خنخن بسمعي واستوى
يا دليل ضاع ما بين الجبال=في متاهات الديار بسامبوا
تبت عن طرد الهوى لكن محال=توبة العشاق عن طرد الهوى