الا ياصدمة الفرقا الا يا اعنف الصدمات=الا ياجرح مايبرى ونسيانه معاناتي
الا ياحشرة العبره الا يادمعة العبرات=الا ياجمرة الذكرى الا يافايتٍ فاتي
الا ياغيبة القمرا على من ضيع الخطوات=الا ياضلي الحتمي بروحاتي وجياتي
الا يالحظةٍ فيها تبعثر داخلي زفرات=الا ياصحبة الصدمه مع الماضي مع الآتي
اضمد لي طعونٍ مايداويها نزيف ابيات=احاول يمكن ابياتي بها طبٍ لطعناتي
مساحات السنين الماضيه فيها حطام الذات=اماني مولده موته.رفاته يسكن بذاتي
صواديف الزمن والحظ الاغبر منبع الونات=وليلي يمتلي صمته بعبراتي ووناتي
الا ياكل مافيني الا يافايتٍ مامات=سألتك واسألك بالله توادعني ولا تاتي
انا بوعدك اسمي طعنة الفرقا خطا هقوات=وانا لازم اعرف اشلون اميز بين هقواتي
لذا خل نتفق ونحول الدفه على اللي آت=كفايه مامضى واليوم الملم آخر شتاتي
عمر واحد اعيشه ليه اعيشه ذارف الدمعات=عمر ذاتي وغيري من يسبب نزف دمعاتي
فمان الله ياوقتٍ مضى ماعاد لي رجعات=دفنتك في قبورٍ للعدم واحرقت ابياتي