منتدى حايلنا - عرض مشاركة واحدة

02-08-2012, 11:55 PM

السلام عليكم ورحمة الله
خربشه رمضانيه سريعه
اتمنى تروق لكم
/

(فصول القطيعه)

https://dl.dropbox.com/s/b54uvhrn2z1467b/فصول.mp3?dl=1

ْنكذب (الواقع )وحنا نطيعه
ونصدق (المفروض)لو مانفعنا

نسوم (حاجتنا)ولحدن يبيعه
والا(القناعه)لاملكناه بعنا

تنمو على(مهد الاماني)رضيعه
واليا فطمناها رعينا (جزعنا)

نضيق وتضيق الحياة الوسيعه
ولايحس بْوضعنا مجتمعنا

ْنجامل العالم بما نستطيعه
نخفي بضحكتنا لهايب وجعنا

هم قالو ان ماطاعك الوقت طيعه
وانا اقول المشكله يوم طعنا

لازم نعيش احوالنا بالطبيعه
ونزيد (جرعة صبرنا)لاوقعنا*

هذي هي الايام رحله سريعه
لامن فضينا يوم (بالهم)ضعنا

حتى مشاغلنا شكينا صنيعه
نقول : ملينا/تعبنا/شبعنا

على حطام ال(ليت)ذكرى شنيعه
ماغيرتها (لو) مهما برعنا

حتى الشتا لاطال عفنا صقيعه
والصيف لامنه شوانا لذعنا

نرثي صحارينا وننخى ربيعه
ونقول يامزن الوسم لاتدعنا

مدري تناسينا فصول القطيعه
والا لوصل ارحامنا ماربعنا

مانفطن الا لالفتنا فجيعه
ولاتفيد دْموعنا من قطعنا

عشت الحياه وقلت له ياوضيعه
قالت وضيعه والبشر تتبعنا

قلت البشر تفهم ولاهي تبيعه
مساحتك بالضيق ماتتسعنا

قالت تشوف الناس هذي جميعه
تصنع فرحها والكدر ماصنعنا

هذي امورٍ نعرفه بالشريعه
كلن وتفكيره وكلن سمعنا

اصنع ملامح للتفاؤل وذيعه
في بسمتك ياللي تقول انفجعنا

قلت اشكرك يادنيتي يافضيعه
قلتي وانا دونت بالقاف معنى

قريحتي عند اللوازم مطيعه
من راسي الفكره وبالقاف تعنى

؛؛؛؛ بوح وجداني