تدري احب الليل من حب طاريك=والا السهر ماحقق اللي تمنيت
لكن خفوقي لو تناسيت يطريك=وقول وش تكسب ليامنك اطريت
يقول ماتدري عن اللي لجا فيك=يابوح لو تكذب على نفسك اخطيت
اطلق عنان الشوق لعيون غاليك=واكتب حروف الحب لامن تطريت
اكتب من الاشعار شعر ٍ يسليك=سج وتجول في وصايف من اغليت
مدام للذكرى رحول ٍ توديك=ارحل وتلقى راحتك لو تعنيت
وليا وصلته لاتقول اني اغليك=ولاتقول انك لجل شووفته جيت
وان قال لك يابوح ربي يحييك=سلم سلام اهل السفن لاتعديت
لاتستثيرك فزته لو يناديك=لاتظلمه بالحب يومك تخليت
وانا ادري ان الحظ خيّب هقاويك=مهما تقول انك على ضمته ميت
ماهنت نفسك يوم غازلت ماضيك=ولاخذلت الحب رغم انك ابطيت
حضنت صوره من دواخل محانيك=بحضور شعرك والقلم والتناهيت
عادي تحب الليل والليل يعطيك=مساحة ٍ فيها تباريح ماخفيت