وهذا رد بوح على قصيدة الحرفين
ارعدي يامزنة القاف رعادي=وابرقي برق ٍ يفزز هل الطوله
امطري من قدح راسي تودادي=للكريم اللي قوافيه مفتوله
وافي الخوه وشيخ ٍ من اسيادي=والصعايب عند كفيه محلوله
ياهلابك ياهلا يابن الاجوادي=ياهلابك عد مالبيت حجوله
اتقدم بالمثايل من فوادي=بسم ربع ٍ قالو الشيخ فزوله
تستحق امن القوافي تفرادي=واسمك اللي للشيم صار مدلوله
اخر الحرفين ثاير به زنادي=اتحرى من يجاوبني ابقوله
مانعادي جاهل ٍ دايم انهادي=وان طنينا فالمحاديب مسلوله
بوح وجداني يتل التوجادي=والصدى بارواحكم تصهل اخيوله
ادري ان الحب للروح هجادي=مانلوم اللي بالاشعار غنوله
اللقا ميلاد والهجر جلادي=والسهر قبر ٍ به احلام مقتوله
والزمن راوي وبالجرح الاسنادي=والعمر ياما به اسرار مقفوله
والغلا دايم للآمل مدادي=يعتذر للحاضر ويكسب الجوله
ينتظر بكرا ويصفق بالايادي=لهفة ٍ من شدته طاح سعبوله
وان لفا يلفي بتوكيد الابعادي=لاتلاقي ..والمقادير مقبوله
مايفيد الجرح تكميد كمادي=والتناسي بنج مادام مفعوله
راسي اللي مالفا عينه رقادي=شرع البيبان لطيوف شدوله
يبتديهم بالتنشاد ويدادي=من حبيبه ياترى ويش جابوله
ياعساه اعتق خفوق ٍ معه بادي=بشرو راسي والافراج زفوله
قالو ان كانك تبي درب الاسعادي=لاتفكر يعتق الروح بسهوله
قلبك اللي تنشده ماله ايجادي=مات مبطي والبقا فيك يازوله
قلت انا مات ! ومعه صار ميلادي=اعشقه باللي بقابي وقولوله
شفت ياشيخ القصايد ومسنادي=كيف قافك طيّح اهداب مبلوله
وســــــلامتكم