ما عاد يمديك تخفي طبعك القاسي=خلاص تبنا .. عرفنا نفسك القشرا
ياما كتمنا على شانك بالانفاسي=وياما صبرنا ولا جاب الصبر قدرا
يا كثر ما بالغلط وطيت لي راسي=ويا كثر موفيت لك .. وانته ولا تدرا
يومك عزيز وغلاك يشب نبراسي=بنيت لك من غرامي بالهوى قصرا
جندت لك كل ما فيني من احساسي=واليوم هديت قصرك بيدك الغبرا
ليتك عرفت الهوى بالجاحد الناسي=ليتك تعلمت يا جرح الغلا .. تقرا
تعبت اعالج غلاك بكل مقياسي=تعبت ادور رضاك .. والتمس عذرا
واليوم منك بصدّر نشرة افلاسي=ابحفظ الما بوجهي قبل ما يعرا
وابطوي اوراق حبك طي قرطاسي=واشعل بها نار وارميها على الجمرا
احرقت رسم الغلا من شدة الباسي=وكسرت عهد الوفا يا جعلك الكسرا
طيرت فرخ القطا من عشه الماسي=وذيرت في داخلي ريمية الصحرا
جرحتني جرح من عقبه بدا ياسي=ودفنت لي حبي العايش بلا قبرا
ان كان طبعك كذا ما عاد به باسي=انته بدربك .. وانا جرحي يبي يبرا
ابطرد الهم واسلا عنك يا قاسي=واروض النفس واجبلها على الصبرا